अमर खड्का, सुनसरी, ८ जेठ । प्रदेश १ का दुईवटा उपमहानगरपालिकामध्ये इटहरीमा २०४६ सालपछि पहिलोपल्ट नेपाली काँग्रेसले नेतृत्व गर्ने अवसर पाएको छ । गठबन्धनका तर्फबाट उम्मेदवार बनेका हेमकर्ण पौडेलले ३३ हजार ४९ मत ल्याएर विजयी भएसँगै पहिलोपल्ट काँग्रेसले नेतृत्व गर्ने अवसर पाएको हो ।

गाउँ विकास समिति, नगरपालिका हुँदा र उपमहानगरपालिका भएर २०७४ सालमा भएको निर्वाचनमा नेकपा एमालेले नेतृत्व गर्दै आएको थियो । यसपटक भने काँग्रेसका पौडेलले एमालेका मेयरका उम्मेदवार याम सुब्बालाई पाँच हजार १८ मतले हराएर विजयी भएका हुनुभएको हो ।

सुब्बाले २८ हजार ३१ मत ल्याउनुभयो । मेयरमा विजयी पौडेल काँग्रेस इटहरी उपमहानगर सभापति हुनुहुन्छ । इटहरी उपमहानगरपालिकाको उपमेयरमा भने एमालेका तर्फबाट संगीता चौधरी विजयी हुनुभएको छ । उहाँले ३२ हजार ४२६ मत प्राप्त गर्नुभयो । उहाँका प्रतिस्पर्धी गठबन्धनका तर्फबाट एकीकृत समाजवादीका केशबकुमार विष्टले १८ हजार ३१ मत ल्याउनुभएको छ ।

इटहरीमा यसपटक कुल एक लाख ४ हजार ६२६ मतदातामध्ये ७३ हजार ७३२ मत खसेको छ। इटहरीमा यसपटक मेयरमा काँग्रेसले नेतृत्व गरेपनि वडामा भने २०७४ सालको निर्वाचनको भन्दा आधा कम वडा जितेको छ । यसपटक नेपाली काँग्रेसले पाँचवटा वडा मात्र जितेको छ। नेकपा एमालेले अघिल्लो पटकभन्दा वडामा विजयी संख्या बढाएको छ। एमालेले यसपटक १४ वटा वडा जित्न सफल भएको छ । एउटा वडामा भने एमालेबाट असन्तुष्ट भएर स्वतन्त्र उम्मेदवारी दिएका वडाध्ययक्षसहित प्यानल नै विजयी भएको छ।  

२०७१ सालमा इटहरी नगरपालिकामा हाँसपोसा, एकम्बा, पकली र खनार गाभिएर उपमहानगरपालिका बनेको थियो । पूर्वकै उदाउँदो शहर इटहरी उपमहानगरपालिकामा २०७४ सालको निर्वाचनमा मेयर–उपमेयरमा  एमालेका उम्मेदवार बिजयी हुनुभएको थियो । मेयरमा द्दारिकलाल चौधरी र उपमेयरमा लक्ष्मी गौतम बिजयी हुनुभएको थियो । त्यतिबेला इटहरीमा कुल ७७ हजार ६७७ मतदातामध्ये ५७ हजार २४६ मत खसेको थियो ।त्यो बेला यहाँबाट एमालेमा आठ जना वडाअध्यक्ष र  काँग्रेसले ११ वडा अध्यक्ष जितेको थियो ।

यस्तै, नेता  विजय गच्छदारले तत्कालिन समयमा नेतृत्व गरेको पार्टीका तर्फबाट वडा नं. १० मा वडाध्यक्ष जितेपछि पछि काँग्रेसमै समायोजन भएका थिए । इटहरी नगरपालिका छँदा २०५४ को निर्वाचनमा काँग्रेसले एउटा मात्र वडा जितेको थियो । इटहरीमा २०४९ सालमा गाउँ विकास समिति हुँदा स्वर्गीय प्रमोद श्रेष्ठले जित्नुभएको थियो । इटहरी २०५३ सालमा नगरपालिका भएर २०५४ सालमा भएको  निर्वाचनमा जित्ने एमालेकै बर्चस्व थियो । त्यतिबेला नेपाली काँग्रेसले एउटा मात्र वडा जितेको थियो ।