मधेसको बलिदानले नै देशमा गणतन्त्र स्थापित भएको होः प्रचण्ड

एसपी गौरब

१३, कार्तिक २०७८

मधेसको बलिदानले नै देशमा गणतन्त्र स्थापित भएको होः प्रचण्ड

सर्लाही, १३ कार्तिक । नेकपा (माओवादी केन्द्र) का अध्यक्ष तथा पुर्व प्रधानमन्त्री पुष्पकमल दाहाल (प्रचण्ड)ले मधेसको बलिदानले नै देशमा गणतन्त्र स्थापित भएको बताउनुभयो ।आज सर्लाहीमा भएको माओवादी केन्द्र निकट अखिल नेपाल शिक्षक संगठन र मधेसवादी दल निकट नेपाल लोकतान्त्रिक शिक्षक फेडेरेसन बीचको एकता घोषणा समारोहलाई सम्वोधन गर्दै कार्यक्रमका प्रमुख अतिथि तथा नेकपा (माओवदाी केन्द्र)का अध्यक्ष प्रचण्डले यस्तो बताउनु भएको हो ।

मधेसको बलिदानले नै देशमा गणतन्त्र स्थापित भएको बताउँदै मधेशवादी दलहरुसंग पार्टी एकता गरेको अगाडी बढ्ने विषयमा आफुले छलफल शुरु गरेको समेत अध्यक्ष प्रचण्डले बताउनु भयो । उहाँले पार्टी एकता गर्दा जसपाका नेताहरुलाई सम्मानजनक स्थान दिन पनि आफू तयार रहेको बताउनु भयो ।

उक्त एकता घोषणा कार्यक्रमलाई सम्वोधन गर्दै अध्यक्ष प्रचण्डले उपेन्द्र यादव, महेन्द्र राय यादवलगायतका नेताहरुको नाम लिँदै सरकार निर्माणमा गठवन्धन भइसकेकाले अब पार्टी एकता गर्न सकिने बताउनुभयो ।

मधेसी जनताको हितमा काम गर्न पार्टी एकताको प्रस्ताव आफूले गरेको उहाँले बताउँनु भयो । आफू जनकपुर आएर पार्टी एकताको घोषणा गर्न तयार रहेको उहाँको भनाई छ । अहिलेको गठवन्धन सरकारले मधेसका नागरिकतासम्वन्धी समस्याको चाँडै समाधान गर्ने प्रतिवद्धता समेत व्यक्त गर्नुभयो । उहाँले मधेशले आफुलाई माया गरेको बताउँदै आफुले मधेशबाट पाउँने माया निरन्तर पाई राख्ने पनि दाबी गर्नु भयो ।