कांग्रेस बैठकबाट थापाको राजनीतिक प्रतिवेदन पारित

इच्छाकामना न्युज

१९, आश्विन २०८३

कांग्रेस बैठकबाट थापाको राजनीतिक प्रतिवेदन पारित

काठमाडौं। नेपाली कांग्रेसका सभापति गगनकुमार थापाले १५औँ महाधिवेशनमा पेस गर्ने राजनीतिक प्रतिवेदन केन्द्रीय कार्यसमिति बैठकले पारित गरेको छ।

चार वर्षका लागि कांग्रेसको राजनीतिक, वैचारिक, संगठनात्मक तथा आर्थिक कार्यदिशा समेटिएको प्रतिवेदनमा पार्टीको विगतको आत्मसमीक्षा, सरकारलाई खबरदारी, निर्वाचनपूर्व गठबन्धन नगर्ने नीति, पार्टी पुनर्संरचना, निजी क्षेत्रसँग सहकार्य र युवा सहभागितालगायत विषय समेटिएका छन्।

प्रतिवेदनमा पछिल्ला दुई दशकमा कांग्रेसले आफ्नो मूल उद्देश्यभन्दा पद र सत्तालाई प्राथमिकता दिएको आत्मसमीक्षा गरिएको छ। गठबन्धन व्यवस्थापन, भागबन्डा, गुटबन्दी र लेनदेनको राजनीतिले पार्टीको नैतिक धरातल कमजोर बनाएको उल्लेख छ।

युवापुस्तासँग पार्टीको दूरी बढेको र नागरिकका बदलिँदा अपेक्षा बुझ्न नसकेको स्वीकार गर्दै पार्टी सुधारको संकल्प गरिएको छ।

त्यस्तै, भदौ २३–२४ को जनउभार र कांग्रेसको पराजय, प्रतिपक्षीय भूमिका, निर्वाचन तथा गठबन्धन नीति, वैचारिक नवीकरण, आर्थिक विकास, रोजगारी, कृषि, उद्योग, प्रविधि तथा कृत्रिम बुद्धिमत्ता, संघीयता, संविधान र संगठन सुधारका विषय पनि प्रतिवेदनमा समेटिएका छन्।

प्रतिवेदनमा प्रधानमन्त्रीको दुई कार्यकालको व्यवस्था, निर्वाचन सुधार, पार्टीभित्र भ्रष्टाचार नियन्त्रण, आन्तरिक अनुशासन तथा युवाका लागि विशेष व्यवस्थासहित ‘समुन्नत नेपाल, सम्मानित नेपाली’ अवधारणा कार्यान्वयनका विषयसमेत प्रस्ताव गरिएको छ।