भरतपुर । भदौ १० गते आएको भीषण बाढीमा ज्यान गुमाएकाहरुको बौद्ध परम्पराअनुसार कर्मकाण्ड (घेवा) गरिएको छ । भरतपुर–५, नारायणपुरस्थित उग्र्यान न्होर्बु छ्याएलिङ गुम्बाले २१औँ दिनको तिथि पारेर बौद्ध परम्पराअनुसारको संस्कार गरेको हो ।

बाढीमा बगेर ज्यान गुमाएकाहरुको आत्मशान्तिका लागि सामूहिक घेवा गरिदिएको गुम्बाका अध्यक्ष चेतबहादुर तामाङले जानकारी दिए ।लामा गुरूहरुबाट विधिपूर्वक शान्तिपाठ गर्नुका साथै दीप प्रज्वलन गरेर घेवा कार्य सम्पन्न गरेको उनले बताए । ‘बाढीका कारण हजारौँ नागरिकले ज्यान गुमाउन बाध्य भएको हुँदा उनीहरुको आत्मा भड्किरहेको छ । खाना पाएका छैनन् । त्यसकारण बाटो तोरण गर्ने मुक्ति पाएको छैन ।

त्यसकारण उनीहरुको स्वर्गमा सहज यात्रा होस् भन्ने कामनाका लागि हामीले सामूहिकरुपमा यो कार्यक्रम गरेका हौँ’, उनले भने, ‘यसमा कुनै जाति र धर्म हेरिनु हुँदैन ।’भरतपुर–५ का वडा अध्यक्ष युद्धप्रसाद श्रेष्ठले भोटेकोशी बाढीले देशलाई नै मर्माहत बनाएको बताउँदै आत्मशान्तिका लागि विभिन्न संघसंस्थाले गर्दै आएको कार्यक्रमले पीडितको घाउमा मल्हम लगाउने काम भएको बताए । कार्यक्रमले विपद्को समयमा हामी पनि सँगै छौँ भन्ने सन्देश दिएको उनले बताए ।

बाढीका कारण बेपत्ता भएका व्यक्तिको हकमा राज्यले ध्यान दिएर कानुन संशोधन गर्नुपर्ने उनको भनाइ छ । ‘राज्यले १२ वर्षपछि मात्रै मान्छे नभेटिएपछि बल्ल मृतक घोषणा गर्ने कानुनी व्यवस्थालाई सरकारले फेर्नुपर्छ’, उनले भने, ‘घटनाको प्रकृतिलाई हेरेर पनि कानुन निर्माण गर्न आवश्यक छ ।’

१८औँ दिनमा नारायणी नदीकिनारमा गएर सुर (पिण्ड) चढाएको गुम्बाले २१औँ दिनमा बौद्ध परम्पराअनुसारको घेवा सम्पन्न गरेको गुम्बाका प्रमुख लामा पेमा वाङ छुगले जानकारी दिए । उनका अनुसार २१औँ दिनमा पनि सुर चढाइएको थियो । विपद्का कारण मृतकहरुको आत्मा भड्किएको हुँदा त्यसलाई शान्त पार्न र स्वर्गमा शान्तिपूर्ण तरिकाले बास बस्न सकून् भन्ने उद्देश्यले कार्यक्रम आयोजना गरिएको उनको भनाइ छ ।

मृत आत्माका लागि शान्तिको कामनासहित घाइतेहरुको स्वास्थ्यलाभका लागि पनि पूजापाठ गरेर भगवान्सँग प्रार्थना गरेको उनले बताए । ‘कसैले पितृको श्राप भन्छन्, कसैले भगवान्ले दुःख दिएको भन्छन् । तर, यो विपत्ति कसैले ल्याइदिएको होइन, हामी आफैँले निम्त्याएका हौँ’, लामा गुरू पेमा वाङ छुगले भने, ‘त्यसकारण मानवजीवन रहेसम्म सत्कर्मको बाटो रोज्नुपर्छ, सत्कर्मको काम गर्नुपर्छ । त्यसका लागि पनि आज हामीले बौद्ध परम्पराअनुसारको कार्यक्रम गरेका हौँ ।’बुधबार बिहानदेखि दिनभर लामा गुरूहरुबाट पाठ वाचनसहित शान्तिको कामना गरिएको थियो ।