काठमाडाैँ । इसरायली डिफेन्स फोर्स (आइडिएफ) ले हमास आक्रमणपछि बेपत्ता नेपाली नागरिक विपिन जोशी जीवित नरहेको बताएको भए पनि नेपाली पक्षले यसलाई अझै औपचारिक पुष्टि मान्न तयार छैन ।

आइडिएफले सोमबार विपिनका परिवार र इसरायलस्थित नेपाली दूतावाससँग भिडियो संवाद गर्दै ‘विपिन अब जीवित छैन’ भन्ने जानकारी दिएको थियो । उक्त संवादमा विपिनकी आमा पद्मा र बहिनी पुष्पा अमेरिकाबाट जोडिएका थिए भने परिवारका सदस्य किशोर जोशी, राजदूत धनप्रसाद पण्डित र इसरायली सेनाका अधिकारीहरू सहभागी थिए ।

राजदूत पण्डितका अनुसार आइडिएफ अधिकारीहरूले केही बन्धकहरूलाई छिट्टै मुक्त गर्ने बताउँदै, मृतक ठहर गरिएका केही व्यक्तिहरूको शव अझै फेला नपरेको जानकारी पनि दिएका छन् । तर परराष्ट्र मन्त्रालयले भने आइडिएफको जानकारीलाई केवल प्रारम्भिक आकलनका रूपमा लिएको बताएको छ ।

मन्त्रालयका प्रवक्ता लोकबहादुर पौडेल क्षेत्रीका अनुसार, विगतमा पनि आइडिएफका प्रारम्भिक विवरण पछि परिमार्जन भएका थिए । उनका शब्दमा, “यो अन्तिम पुष्टि होइन । आइडिएफले पनि आकलनका आधारमा बोलेको हुन सक्छ । विगतमा पनि यस्ता विवरणहरू परिवर्तन भएका थिए। हामी अझै उहाँ सकुशल फर्किनुहुने आशामा छौं ।”

विपिन जोशी गत वर्ष अक्टोबरमा हमास आक्रमणका क्रममा बेपत्ता भएका नौ जना नेपालीमध्ये एक हुन्। अरू आठ जनाको शव पहिल्यै पहिचान गरिएको थियो, तर विपिनको अवस्था अझै अनिश्चित नै छ।

सरकारका अनुसार इसरायलमा रहेका नेपालीहरूका अवस्थाबारे निरन्तर अनुगमन भइरहेको छ। मन्त्रालयले विपिनको अवस्थाबारे इसरायल सरकारसँग पुनः आधिकारिक पुष्टि माग्ने तयारी गरिरहेको जनाएको छ।

यसबीच, विपिनका परिवार भने आशा र पीडाबीच दोधारमा छन्-“हामीले आधिकारिक पुष्टि नभएसम्म उहाँ जीवित नै हुनुहुन्छ भन्नेमा विश्वास गर्छौं,” परिवारका एक सदस्यले भने ।

२०७९ असोजमा हमासको आक्रमणका बेला इसरायलको दक्षिणी क्षेत्रमा कार्यरत १७ जना नेपाली विद्यार्थीमध्ये नौ जना मारिएका थिए, चार जना घाइते भए भने एकजना बेपत्ता भएका थिए, उनी नै विपिन जोशी हुन्।

हाल इसरायल र हमासबीच कैदी र बन्धक साटासाटको प्रक्रिया चलिरहेको बेला विपिनबारे आएको आइडिएफको ताजा भनाइले फेरि चर्चा बढाएको छ। तर नेपाल सरकारले अझै “अन्तिम सत्य” खुल्न बाँकी रहेको जनाएको छ।