गोरखा, असार ९ । सहिद लखन गाउँपालिकाको सत्रौं गाउँसभा आज सम्पन्न भएको छ। गाउँपालिकाले आगामी आर्थिक वर्ष २०८२/८३ का लागि कुल रु ५९ करोड ८२ लाख ८७ हजार १ सय ९२ रुपैयाँ बराबरको बजेट पारित गरेको हो।

गाउँपालिकाले आन्तरिक स्रोतबाट रु २ करोड ३७ लाख ८० हजार रुपैयाँ राजस्व संकलन हुने अनुमान गरेको छ। संघीय र प्रदेश सरकारबाट प्राप्त हुने विभिन्न शीर्षकका अनुदान र राजस्व बाँडफाँडमार्फत रु ५७ करोड ४५ लाख ७ हजार १ सय ९२ रुपैयाँ प्राप्त हुने उल्लेख गरिएको छ।

संघीय सरकारबाट प्राप्त हुने अनुदान विवरण: राजस्व बाँडफाँड (मूल्य अभिवृद्धि कर, अन्तःशुल्क, रोयल्टी आदि): रु ११ करोड ६१ लाख ७४ हजार १ सय ९२

संघीय समानीकरण अनुदान: रु १४ करोड १६ लाख

संघीय सशर्त अनुदान (चालु): रु २४ करोड ९८ लाख

संघीय सशर्त अनुदान (पूँजीगत): रु २१ लाख

संघीय विशेष पूँजीगत अनुदान: रु १ करोड ६ लाख

संघीय समपूरक अनुदान (पूँजीगत): रु ८७ लाख

प्रदेश सरकारबाट प्राप्त अनुदान: प्रदेश समानीकरण अनुदान: रु १ करोड ९९ लाख ७८ हजार

प्रदेश समपूरक अनुदान (पूँजीगत): रु ६० लाख

प्रदेश विशेष अनुदान: रु ४० लाख

गत वर्षको नगद मौज्दात र जनसहभागिता समेत समेटेर बजेट तयार गरिएको हो। यो बजेट चालु आर्थिक वर्षको तुलनामा करिब १ प्रतिशतले कम रहेको छ। खर्चको विवरण: कुल बजेटमध्ये २२ प्रतिशत पूँजीगत खर्च र ७८ प्रतिशत चालु खर्चमा विनियोजन गरिएको छ।

विषयगत विनियोजन यस प्रकार रहेको छ:

आर्थिक विकास: २.४ प्रतिशत

सामाजिक विकास: १०.४ प्रतिशत

पूर्वाधार विकास: १४.२ प्रतिशत

सुशासन तथा अन्तरसम्बन्धित क्षेत्र (वन, वातावरण, विपद् व्यवस्थापन): २.७ प्रतिशत

कार्यालय सञ्चालन तथा प्रशासनिक खर्च: १८.६ प्रतिशत

सशर्त र विशेष अनुदान अन्तर्गतका योजनाहरू: ५१.७ प्रतिशत गाउँपालिकाका अध्यक्ष रमेश थापाले बजेटले स्थानीय आवश्यकता र प्राथमिकतालाई समेट्ने प्रयास गरिएको बताए।