गोरखा, असार ७ । गोरखा जिल्लाको गण्डकी गाउँपालिकाको १८ औँ गाउँसभा अधिवेशन सुरु भएको छ। अधिवेशनको प्रारम्भमा गाउँपालिका अध्यक्ष दीपक तिमिल्सिना 'सकार'ले आर्थिक वर्ष २०८२/८३ का लागि नीति तथा कार्यक्रम प्रस्तुत गर्नुभयो, जसलाई छलफलपछि गाउँसभाले पारित गरेको छ।

सो अवसरमा चालु आर्थिक वर्षको बजेट संशोधन विधेयकसमेत सर्वसम्मतिले अनुमोदन गरिएको गाउँपालिकाले जनाएको छ। नीति तथा कार्यक्रममाथि गाउँसभा सदस्यहरूले विभिन्न धारणा तथा सुझाव राखेका थिए। छलफलपछि अध्यक्ष सकारले नीति तथा कार्यक्रम निर्णयार्थ प्रस्तुत गर्नुभएको थियो।

प्रस्तावित नीति तथा कार्यक्रममा पालिकाबाट रु. ५ लाख र वडाबाट रु. १ लाखभन्दा माथिका मात्र योजनाहरू सञ्चालन गर्ने व्यवस्था गरिएको छ। युवाहरुलाई उद्यमशीलता र आत्मनिर्भरता तर्फ अभिप्रेरित गर्दै वैदेशिक रोजगारीको विकल्प सिर्जना गर्ने नीति समेत समावेश गरिएको छ।

यस्तै, पर्यटन प्रवर्द्धनका लागि त्रिशूली जनलयात्रादेखि 'भिजिट भैरवी' र 'भिजिट महादेवडाँडा' अभियान सञ्चालन गरिनेछ। सहकारी तथा पालिकाबीच साझेदारीमा उत्पादन र बजारीकरण प्रवर्द्धन गर्ने, ‘एक सहकारी, एक व्यवसायिक उत्पादन’ अवधारणा लागू गर्ने तथा कृषि यान्त्रीकरण कार्यक्रम अगाडि बढाइने नीति रहेको छ।

शिक्षा क्षेत्रमा ‘एक वडा, एक माध्यमिक विद्यालय’ कार्यक्रम सञ्चालन गरिने छ भने शिक्षकलाई सूचना प्रविधिसँग अभ्यस्त बनाउँदै अद्यावधिक तालिम प्रदान गरिने योजना नीति दस्तावेजमा उल्लेख छ।

अध्यक्ष तिमिल्सिनाले नीति तथा कार्यक्रमको प्रभावकारी कार्यान्वयन नै गण्डकी गाउँपालिकाको समृद्ध भविष्यको आधार हुने विश्वास व्यक्त गर्नुभयो।

गाउँपालिकाले आगामी गाउँसभा बैठक असार ९ गते बस्ने जानकारी गराएको छ।