देवघाट, माघ ११ । देवघाटधाम जेसीजको आयोजना तथा देवघाट गाउँपालिकाको आर्थिक सहयोगमा शुक्रबार एक दिने क्षमता अभिवृद्धि तालिम दिइएको छ ।

देवघाट ५ स्थित नमस्ते देवघाट गार्डेन रिसोर्टमा आयोजना गरिएको उक्त तालिममा देवघाट गाउँपालिका-५ वडा भित्रका सम्पूर्ण टोल विकास संस्था,सहकारी संस्था,सामुदायिक वन र अन्य संघसंस्थाहरूका पदाधिकारीहरुका लागि दिइएको देवघाटधाम जेसीज वर्ष-२०२५ का अध्यक्ष जेसी प्रशन्न ढकालले बताउनुभयो ।

संस्थाको नेतृत्व गर्दै आइरहेको जो कोहिमा पनि नेतृत्व गर्ने क्षमता राम्रो छ भने मात्र त्यो संस्था राम्रो हुन्छ भन्ने कुरालाई मनन गर्दै तालिमको आयोजना गरिएको अध्यक्ष ढकालले बताउनु भयो । उक्त तालिमको उद्घाटन गर्दै देवघाट गाउँपालिकाका अध्यक्ष तथा देवघाटधाम जेसीजका मानार्थ सदस्य तिल बहादुर थापाले देवघाटधाम जेसीजले समाज र स्वदेशमै केही गर्छु भन्ने देवघाटका केही युवाहरूको लागि अति राम्रो काम गर्दै आएको बताउनुभयो । जेसीजले विभिन्न तालिमहरूको आयोजना गर्दै युवाहरूलाई उत्प्रेरित गराउदै आइरहेको हुदाँ समन्वय गर्दै तालिमहरू आयोजना गरिएको अध्यक्ष थापाले भन्नुभयो ।

उक्त एकदिने तालिमको प्रशिक्षक बिदुर के.सी ले प्रशिक्षण दिनभएको थियोे । देवघाटधाम जेसीजले स्थापना कालदेखि नै तालिमहरू दिदै आइरहेको र यस वर्ष प्रत्येक वडामा एकएक दिने क्षमता अभिवृद्धि तालिमको आयोजना गरिएको हो ।

सो तालिममा देवघाट-५ वडाका सदस्य कमला गुरूङ र याम बहादुर मगर,देवघाटधाम जेसीजका संस्थापक अध्यक्ष जेसी विकास सापकोटा,देवघाटधाम जेसीज वर्ष-२०२४ का अध्यक्ष जेसी रघु मल्ल,टोल विकास संस्था,सहकारी संस्था,सामुदायिक वन,जेसीजका पदाधिकारीहरू र अन्य संघसंस्थाहरूका पदाधिकारीहरुको सहभागीता रहेको थियोे ।