भरतपुर । हात भाँचिएपछि पनि उपचार अभावमा रहेका तनहुँका ११ वर्षीय रामबहादुर भुजेलको तेस्रो शल्यक्रिया सफल भएको छ । चितवनको भरतपुरस्थित एलाइभ हस्पिटल एण्ड ट्रमा सेन्टरमा भुजेलको उपचार गरिएको हो ।

आर्थिक अभावका कारण लामो समयसम्म उपचार नपाएका भुजेललाई विभिन्न सञ्चारमाध्यममा समाचार सार्वजनिक भएपछि एलाइभ हस्पिटलले निःशुल्क उपचार गराइदिएको हो ।

लडेर भाँचिएको दाहिने पाखुराको हड्डी नै कुहिएपछि त्यसलाई फालेर उपचार थालिएको हस्पिटलले जनाएको छ । हस्पिटलका प्रमुख एवं वरिष्ठ हाडजोर्नी तथा नसारोग विशेषज्ञ डा. प्रमोद लामिछानेको नेतृत्वमा अर्थोपेडिक सर्जनहरु डा. अनिल भट्टराई, डा. सन्तोष कुँवरलगायतले भुजेलको उपचार गरेका हुन् । शल्यक्रियापछि आइतबार उनी ‘डिस्चार्ज’ भएका छन् ।

‘हाललाई शल्यक्रियापछि पाखुरामा स्टील राखिएको छ’, उनले भने, ‘घाउ ठीक नभएसम्म नियमित फलोअपमा रहनुपर्छ ।’ डा. भट्टराईका अनुसार भुजेलको दुई महिनाअघि पनि शल्यक्रिया गरिएको थियो । भुजेलको उपचार प्रक्रिया लामो हुने हुँदा अझै केही महिनासम्म अस्पतालको निगरानीमा रहनुपर्ने डा. भट्टराईले जानकारी दिए ।

चितवनमा उपचार पाउने भएपछि भुजेल समाजसेवा समिति चितवनले उनको उपचारमा अभिभावकत्व प्रदान गर्दै आएको छ । बालक रामबहादुर भुजेल समितिका अध्यक्षसँग बस्दै आएका छन् । उनले बालकको उपचार र पालनपोषणसँगै शिक्षादीक्षाका लागिसमेत योगदान दिँदै आएका छन् ।

हात भाँचिएपछि विद्यालय जानसमेत वञ्चित भएका रामबहादुरलाई भरतपुर–१५, फूलबारीस्थित गौतम आधारभूत विद्यालयमा भर्ना गरिदिएका छन् । देवघाट गाउँपालिका वडा नं–४, सिञ्चाङका भुजेलले लामो समयसम्म पनि उपचार नपाउँदा उनको भाँचिएको हड्डी नै बिग्रिएको थियो । अस्पताल आएपछि बिग्रिएको हड्डी फालेर जुटाउने प्रयास गरिएको हस्पिटलले जनाएको छ ।