नेपाली कांग्रेसका सभापति शेरबहादुर देउवाका दाहिने हात मानिएका बालकृष्ण खाण भुटानी शरणार्थी काण्डमा डामिएपछि उनले अदालतबाट रिहाइ पाए पनि सार्वजनिक रुपमा मुख देखाउन सकेका छैनन् । मुद्दा काठमाडौँ जिल्ला अदालतमा विचाराधीन नै छ ।

कांग्रेसकै अर्का नेता विजयकुमार गच्छदार बालुवाटारको जग्गा घोटाला काण्डमा विशेष अदालतको कठघरामा बयान दिइरहेका छन् । उनी आफूले संविधान निर्माणमा अगुवाइ गरेको भनेर घटनालाई राजनीतिक रङ दिन खोजिरहेका छन् ।

ठीक यही बेला कांग्रेस सांसद विनोद चौधरीको व्यापारिक घराना सीआईबीको छानबिनमा तानिएको छ । बाँसबारीको छाला जुत्ता कारखानाको जग्गा हडपेको आरोप चौधरी समूहका सदस्यहरुमाथि लागेको छ । अरुणकुमार चौधरी र अरु केही व्यक्ति त थुनामा गइसकेका छन् । अब विनोद चौधरी र वसन्त चौधरी बाँकी छन् । 

उता स्वास्थ्यमन्त्री मोहनबहादुर बस्नेत र पूर्वमन्त्री ज्ञानेन्द्रबहादुर कार्कीलाई अख्तियार दुरुपयोग अनुसन्धान आयोगले बयानका लागि बोलाएको छ । अख्तियारले बारम्बार ताकेता गर्दा पनि उनीहरुले उपस्थित हुन आलटाल गरेका छन् । भलै अख्तियारले उनीहरुलाई भागेर जान नसक्ने गरी घेरा हालिसकेको छ ।

बस्नेत बहालवाला मन्त्री भएकाले प्रधानमन्त्रीको प्रतिष्ठाका लागि मात्र नसमातेको, यदि उनले आफै उपस्थित हुन मानेनन् भने प्रधानमन्त्रीसँगै कुरा गरेर पक्राउ गर्ने योजना अख्तियारको छ । आफ्नो प्रतिष्ठा जोगाउने हो भने प्रधानमन्त्रीले बस्नेतलाई पक्राउअघि नै बर्खास्त गर्नुपर्ने हुन्छ ।

पूर्वप्रधानमन्त्री एवं कांग्रेस सभापति शेरबहादुर देउवाको सबैभन्दा निकटस्थ नेताहरु एकपछि अर्को गरी आपराधिक अभियोगमा पक्राउ परी मुद्दाको सामना गर्नुपर्ने अवस्था आएको छ । यो भनेको उनको राजनीतिक आधार भत्किँदै जानु हो । यसै पनि कांग्रेसभित्रै देउवाविरुद्ध शेखर कोइराला, गगन थापा र कृष्ण सिटौलाको अघोषित घेराबन्दी चलिरहेको छ ।

यसमा विश्वप्रकाश शर्मा पनि मिसिएका छन् । आगामी केही दिनमा अरु नेताहरु पनि मिसिने छन् । यो विषम परिस्थितिका बारेमा अब देउवासँग कुनै विवेकपूर्ण तरिकाले छलफल र परामर्श गर्ने मान्छे छैनन् । कुनै औत्यिपूर्ण र युक्तिसंगत उपाय दिने मान्छे छैनन् । आफ्नो स्वार्थका लागि भेला भएकाहरुको झुण्ड मात्र देउवासँग छ । उनीलाई निःस्वार्थ साथ दिएका एक मात्र नेता प्रदीप गिरी थिए । उनी बितेर गइसके । 

यस्तो एक्लो र असहाय अवस्थामा पुगेका देउवाका लागि हालको सरकार पनि निल्नु न ओकल्नु भएको छ । उनको पार्टीभित्रै पृष्ठभूमिबाट कुन शक्तिले खेलेको छ भन्ने भेउ पाउन उनलाई मुस्किल परेको छ । डा. आरजु देउवाले संसदीय समितिमा बाँदर धपाउने उपायको चर्चा खूब गर्छिन् तर आफ्नो वरिपरि भेला भएका स्वार्थीहरुको झुन्डले कुन बेला आफ्नो परिवारै तलबितल पारिदिन्छ भनेर उनले सोचेको देखिँदैन । 

पार्टीभित्रको असहजता छल्न देउवाले महासमिति बैठक तीनचारपटक सारिसके । कहिले तयारी नपुगेको भनेर त कहिले काठमाडौँमा जाडो बढेको कारण देखाएर । अहिले पनि उनी यो बैठक गराउने मुडमा छैनन् । छोरा जयवीरको जन्तले महासमिति बैठक अरु केही महिना पर धकेलिएछ भने पनि अचम्म मान्नुपर्दैन । 

आखिर जे भए पनि देउवाले अहिलेसम्म जोजोलाई विश्वास गरेर र अवसरमा प्राथमिकता दिए, ती सबैले आफ्नो दुनो सोझ्याए । उनले इमानदारीपूर्वक वचनको पक्का भएर शक्तिको साझेदारी गरेकै हुन् । पदको बाँडफाँट गरेकै हुन् । तर, अहिले सबैतिरबाट उनको शक्ति क्षीण हुने अवस्था आएको छ ।