गोरखाको शहिद लखन गाउँपालिकाद्वारा महिला जनप्रतिनिधिहरुलाई क्षमता अभिवृद्वि तालिम प्रदान

इच्छाकामना न्युज

१, माघ २०७७

गोरखाको शहिद लखन गाउँपालिकाद्वारा महिला जनप्रतिनिधिहरुलाई क्षमता अभिवृद्वि तालिम प्रदान

घैरुङ, १ माघ । गोरखाको शहिद लखन गाउँपालिकाले गाउँपालिकाका महिला जनप्रतिनिधीहरुको क्षमता अभिवृद्वि गर्न ३ दिने तालिम प्रदान गरेको छ। गाउँपालिकाले महिला जनप्रतिनिधीहरुको क्षमता अभिवृद्वि गर्नका लागि पुस २७ गते देखि २९ गतेसम्म ३ दिन विभिन्न प्रशासनिक, प्राविधिक, न्यायिक लगायतका विषयमा तालिम प्रदान गरेको हो।
तालिमको बुधबार समापन गरिएको गाउँपालिकाका सुचना अधिकारी पूर्ण बहादुर गहतराजले जानकारी दिनुभयो। उहाँका अनुसार तालिममा अधिवक्ता थानेश्वर दवाडीले स्थानीय सरकार सञ्चालन ऐन सम्बन्धि र गाउँपालिकाका प्रमुख प्रशासकिय अधिकृत जीवन बहादुर आले मगरले गाउँपालिकाको काम कर्तव्य समग्र प्रशासनिक कामहरु बारे तालिममा सहभागीहरुलाई जानकारी गराउनु भएको थियो।
यस्तै उपभोक्ता समिती गठन, यसको कार्य प्रक्रिया बारे गाउँपालिकाका योजना शाखा प्रमुख सानुकाजी बस्नेतले, सामाजिक सुरक्षा तथा पंजिकरणबारे एमआईएस अपरेटर सोम आले र घर नक्सा प्रक्रियाका बारे इन्जिनियर विष्णु थापाले जानकारी गराउनुभएको थियो।
तालिमको समापन गाउँपालिकाका अध्यक्ष रमेशबाबु थापा मगरको प्रमुख आतिथ्यता, गोरखाका सहायक प्रमुख जिल्ला अधिकारी देवी पाण्डे विशेष आतिथ्यता र गाउँपालिकाका उपाध्यक्ष इन्दिरा तिवारीको अध्यतामा सम्पन्न भएको थियो।