सिक्किम । आजदेखि भारतको सिक्किममा दोश्रो अन्तर्राष्ट्रिय तमू सम्मेलन सुरु भएको छ । सिक्किम स्थित देन्ताममा सुरु सम्मेलनको मुख्यमन्त्री प्रेमसिंह तामाङ गोलेले समुद्घाटन गरेका हुन् ।     

कार्यक्रमलाई सम्बोधन गर्दै मुख्यमन्त्री गोलेले गुरुङ समुदायको भाषा संस्कृति जगेर्नाका लागि  सिक्किम सरकार हरदम तयार रहेको बताए । आफु मुख्यमन्त्री भएपछि सिक्किममा दुई स्थानमा गुरुङ समुदायको संस्कृति जगेर्नाका  लागि रोधीघर स्थापना गरिएको  बताए ।  गुरुङ समुदायलाई आदीवासी जनजातीमा सुचितकृत गर्नका लागि केन्द्र सरकार समक्ष सिफारिस गरेको  पनि  मुख्यमन्त्री गोलेले बताए ।  

तमू ह्यूल छोँजधी (गुरुङ राष्ट्रिय परिषद्)का  पूर्व अध्यक्ष रेशम गुरुङले विश्वभर  छरिएर रहेका गुरुङहरुको  रहनसहन एउटै भएको  बताए ।  विश्वभरका  गुरुङहरु संगठित हुनु राजनितिक, धर्म देश र भुगोल भन्दा माथिको कुरा  रहेको बताए । गुरुङहरुमा जहाँ भएपनि एउटै रितिरिवाज र परम्परा कायम रहेको उनको भनाइ छ । 

उनले भने,‘बेलायती महारानीले पनि सलाम चढाउने  त्यस्तो त्यास्तो तक्मा पाउने गुरुङहरु , भेडा चराउँदै  र हलो जोत्दै गुरुङहरु जो अन्तर्राष्ट्रिय रुपमा   फैलिएका छन्, उनीहरुको साझा संस्था, संस्थाहरुको पनि संस्था बनाउनका निम्ति अन्तर्राष्ट्रिय तमु परिषद्को स्थापना गरिएको हो, जो राजनितिक, धर्म भुगोल र सीमाना भन्दा माथि छ ।’ उनले यस संस्थाको तमु  ह्यूल छोँजधीले नेतृत्व गरेको  बताए । 

तमु ह्यूल छोँजधी गुरुङ राष्ट्रिय परिषद्क अध्यक्ष तथा सम्मेलन  आयोजक अन्तर्राष्ट्रिय तमू परिषद्का अध्यक्ष कर्ण बहादुर गुरुङले  विश्वभर रहेका गुरुङलाई एकताको सुत्रमा बाँध्नका लागि यस संस्था स्थापना गरिएको  बताए ।  सम्मेलनमा तमू समुदायको भाषा, धर्म, संस्कार, संस्कृति, आर्थिक अवस्था, सामाजिक अवस्था, शैक्षिक स्थिति, विकास, पहिचान लगाएतको विषयमा व्यापक छलफल र बहस हुने उनले बताए । 

आजदेखि असोज २७ गते अर्थात २०२२ अक्टोबर ११–१२ र १३ गते सम्म  तीन दिन चल्ने सम्मेलनका लागि २५ देशबाट प्रतिनिधिहरु सिक्किममा भेला भएका छन् । 

आज पहिलो दिन विभिन्न देशबाट आएका प्रतिनिधिहरुले आफ्नो देशमा गुरुङ समुदायको अवस्था र भइरहेको गतिविधिबारे रिर्पोटिङ गरेका थिए भने तमू सम्बन्धि लेखिएका पुस्तकको विमोचन र परिषद्को झण्डा सिक्किमको गुरुङ समाजलाई जिम्मेवारी सहित हस्तान्तरण पनि गरिएको थियो।  

अन्तर्राष्ट्रिय तमू परिषदको आयोजनामा सुरु भएको सम्मेलनको अखिल भारतीय गुरुङ तमू बौद्ध संगठनको संयोजकत्वमा र गुरुङ एसोशियशन अफ सिक्किमले व्यवस्थापन गरेका छन् ।