गण्डकी, १४ पौष । गोरखाको घ्याल्चोकमा रहेको ज्ञानमार्ग माध्यामिक विद्यालयमा अनियमितता भएको भन्दै अविभाबकले विद्यालयमा ताला लगाएका छन् ।
गण्डकी गाउँपालिका वडा नम्बर ७ मा रहेको विद्यालयमा भष्ट्राचार भएको, डण्डी खरिदमा अनियमितता भएको, विद्यालयको पैसा ब्यक्तिलाई सापटी दिएको, कर्मचारी नियुक्तीमा आफ्ना मान्छे भर्ती गरेको लगायता विषयमा असन्तुष्टि जनाउँदै अविभाबकले ताला लगाएका हुन् ।
सोमवार विद्यालय पुगेका अविभाबकले प्रधानाध्यापकले राजिनामा दिनुपर्ने, तत्कालन विद्यालयको अनियमितता छानबिन गर्न समिति गठन गर्नुपर्ने, प्रश्नपत्र बाहिरिएको घटनाको छानबिन गर्नुपर्ने लगायत माग राख्दै विद्यालयको प्रशासन कक्षमा ताला लगाईदिएका छन् ।
‘विद्यालयमा एकपछि अर्को अनियमितता भयो’ एक अविभाबकले भने ‘पटक पटक भन्दा सुनुवाई नभएपछि ताला लगाएका हौँ ।’ अफिस कक्षमा तालाबन्दी गरिएपनि पठन पाठन भने निरन्तर गराउनुपर्ने माग अविभाबकको छ ।
विद्यालयका प्रधानाध्यापक टंकप्रसाद नेपालले भने ल्याब टेक्निसियन छनौट प्रक्रियामा जिज्ञासा राखेकाले छलफल भएको बताए । ‘अविभाबकले जिज्ञासा राख्नुभएको हो, हामीले प्रक्रिया पुरा गरेको छौँ’ उनले भने । तालबन्दी भएको विषयमा उनी थप बोल्न चाहेनन् ।
वडा अध्यक्ष तुलसी रेग्मीले विद्यालयको केही विषयमा अविभाबकले चासो राखेको बताए ।
‘अविभाबकले केही विषयमा कुरा उठाउनुभएको छ, पछिल्लो समय ल्याबका कर्मचारी नियुक्तीमा प्रक्रिया मिलेन भन्ने गुनासो हो, हामी छलफल गरेर टुङ्ग्याउँछौँ ।’ विद्यालयमा सोमवार साँझ सम्म छलफल चलेपनि निश्कर्षमा पुगेन । माग सुनुवाई नहुँदा र विद्यालयलाई शैक्षिक केन्द्रको रुपमा बिकास गर्ने योजना नहुँदा सम्म ताला नखोल्ने अविभाबकले चेतावनी दिएका छन् ।